لئنسڊائون پل جا شمعدان

 (لئنسڊائون پل جا شمعدان)

سهولتن ۽ وسائل جي کوٽ دوران برٽش انتظاميا 1883_ 1889ع اسان سکر روھڙي واسين کي ھڪ شاھڪار عجوبو لئنسڊائون پل تعمير ڪري ڏئي ويا جنهن ۾ سندن بہ گهڻي دلچسپي ۽ نفعي جو عنصر شامل ھو

پل جي افتتاح 27 مارچ 1889ع کان 6 مئي 1962ع تائين ھن پل تي ريلوي انتظاميا مک ويھڻ بہ برداش ڪون ڪندي ھئي پر سندن ريلوي سروس ايوب پل تي منتقل ٿيڻ بعد آھستي آھستي ھن پل جي اھميت ختم ٿيندي وئي پوءِ بہ ھو ھن جي ٿوري گهڻي مالڪي 1990ع تائين ڪندا آيا پر بعد ۾ پاڪستاني ٽرانسپورٽ مافيا ھن اداري کي سندس ناخدا ھٿان آھستي آھستي کوکلو ڪندا ويا اڄ اھا حالت آھي جو ھو پنهنجو ٽريڪ بہ سنڀالي نٿا سگهن تہ ھن پل جي مالڪي ڇا ڪندا جيڪي ڪالهہ ھن پل کي رنگ روغن، صفائي ۽ روشنائي سان چمڪائي بيٺا ھئا اڄ ان اداري ھاءِ ڪورٽ ۾ لکي ڏنو آھي تہ اسان جو ھن پل سان واسطو ڪونهي

مان ھاڻي پنهنجي رکيل ٻن تصويرن جي طرف اڃان ٿو جيڪي پل جي کٻي ۽ سڄي پاسي جون مون گذريل ڏينهن ڪڍيون 

جڏھن ھن پل جو افتتاح 1889ع ٿيو تہ ھن پل مٿان رات جي وقت شمعدان ٻرندا ھئا جن لاءِ ماڻهون مقرر ھو جيڪو شام جو ھن جي صفائي ڪري تيل وجهي روشن ڪندو ھو ۽ صبح جو باک ڦٽي مهل گل ڪندو ھو جيڪو سلسلو 1922ع تائين ھلندو آيو جڏھن سکر ۾ DC بجلي گهر رشيد پارڪ سامهو لڳو تہ ريلوي انهن کان بجلي خريد ڪري پنهنجي ماڳن کي روشن ڪيو 

1923ع سکر بيراج وارن پنهنجو پاور ھائوس بيراج روڊ تي تعمير ڪيو جنهن ۾ برطانيا جا ٺھيل 5 وڏا جنريٽر لڳل ھئا جن 1967ع سکر ٿرمل پاور ھائوس جي پاور جنريشن بعد ريلوي محڪمي کي وڪڻي ڇڏيا پاڻ واپڊا کان بجلي ورتي ريلوي وارا ان بيراج واري بجلي گهر تي سکر ۽ روھڙي جي ريلوي ماڳن کي بجلي ڏيندا ھئا ان بعد بيراج واري پاور ھائوس جي مهانگي مرمتي ڪم ڪري ھنن بہ بجلي واپڊا کان  خريد ڪرڻ شروع ڪئي ۽ ھن وقت ھن پاور ھائوس جو ھڪ جنريٽر بجلي ٺاھڻ جي قابل آھي

جيستائين بجلي سستي ۽ ريلوي محڪمو مستحڪم ھو پل رات جو 1990ع تائين روشن رھندي آئي جنهن بعد پل جو زوال شروع ٿيو نہ صفائي نہ مرمت نہ رنگ روغن نہ روشنائي نہ مالڪي رھي

 اڄ رات جو گذرڻ مهل  گذرندڙ ٽريفڪ جي روشنائي سان احساس ٿيندو آھي تہ پل تان گذر ٿي ٿو نت ڪنهن اندھيري گلي مان گذر محسوس ٿيندو آھي

اسانجي سول ادارن سان وابستہ فرد تہ ھن پل بابت روزانو لفظي مرمت ڪرائيندا اچن ٿا جيڪا پل تي فل حال تہ نروار ڪونهي باقي پل الله جي آسري تي بيٺل آھي

آخر ۾ بس اسين تہ ھن اميد سان ڏسڻ گهرون ٿا تہ ڪڏھن ڪو مسيحا اٿي ھن پل جي زندگي کي دراز ڪري ٿو

امداد حسين شاه

ڪوٽ مير يعقوب علي شاه روھڙي