دارا شڪوه ۽ بکر جو قلعو
دارا شڪوه آڪٽوبر 1658ع لاھور کان ملتان لاءِ نڪتو ساڻس 8 ھزار سپاھي ھئا پر سندس منزل بکر جو قلعو ھئي جنهن لاءِ جيڪو کيس خزانو ساڻ ھو ۽ لاھور ۾ جيڪو دستياب ھو کڻي دريا رستي ٻيڙن ۾ نڪتو نومبر ۾ ملتان پهتو جتي ھن بهاالدين زڪريا جي گادي نشين کان پنهنجي لاءِ رسول خدا جي دربار ۾ دعا ڪرائڻ جي درخواست ڪئي تہ کيس اورنگزيب تي سوڀ حاصل ٿئي ھنن چيو اسان رات بهاالدين زڪريا جي روضي تي وڃي دعا گهرنداسين ضرور جواب ملندو ٻي ڏينهن کين گهرائي ھنن کان پڇو منهنجي دعا جو ڇا ٿيو ھنن منهن لٿل شڪل سان جواب ڏنو رسول خدا جي دربار ۾ اسان کان پهرين اورنگزيب پهتل ھو ان ڪري اسان ڏانهن متوجھہ ڪون ٿيا وري اڄ رات عرض رکنداسين وڃڻ مھل کين 25 ھزار روپيا ۽ بهاالدين زڪريا جي قبر لاءِ نهايت قيمتي قبر پوش ڏنو پر اڳلي ڏينهن بہ ھنن ساڳيو جواب ڏنو
دارا کي جڏھن خبر پئي تہ اورنگزيب سندس پيڇو ڪندو ملتان طرف اچي رھيو آھي تہ ھن ملتان مان بکر طرف ڪوچ ڪيو ان وقت کيس 507 ٻيڙيون ھيون ان ۾ خوراڪ جو ذخيرو 8 توبون جن ۾ 80 کان 120 پونڊ جو گولو پوندو ھو قريب ھر ٻيڙي تي ماڻھن سميت ھڪ ٽن وزن رکيو ويو
سخت بک، پياس ۽ گهاٽن جهنگلن مان گذري جڏھن بکر پهتو تہ کيس اطلاع مليو تہ اورنگزيب جو لشڪر بهادر خان جي ڪمان ۾ تيزي سان بکر طرف اچي رھيو آھي ھن فوري حڪم ڪيو تہ 2 ھزار سپاھي بکر جي قلعي تي قبضو ڪن جن ۾ مغل سيد ۽ پٽاڻ سپاھي شامل ھئا باقي دريا اندر سڀني ٻيڙين تي قبضو ڪن جينئن دشمن کي ٻيڙيون ھٿ نہ اچن ان بعد ھو پنهنجي فوج کي ڇڏي پاڻ ٺٽي طرف ويو جتي ڪجهہ ڏينهن آرام ڪيو ھن ٺٽي ۾ رھڻ دوران پڇو تہ ھتي ڪوئي فرنگي پادري ملي سگهي ٿو اتي ھڪ اگهاڙو پاڪار ميلٽ پادري frei petrode santa treza نالي رھندو ھو جيڪو نسلن فليمشن ھو جيڪو اڳ ڪتاب لکندڙ منوچي سان اصفهان ۾ ملي چڪو ھو ھي وڏو نيڪ عالم ھو جنهن کي عربي فارسي ۽ ھندستاني زبان تي عبور ھو دارا ھن سان مليو ۽ ڪافي دير تائين انجيل تي گفتگو ڪئي ۽ کيس پنهنجي دعا لاءِ چيو ۽ اگر مونکي سوڀ ملي تہ مان آگره ۾ گرجا گهر تعمير ڪرائيندم
ان بعد 6 ھزار سپاھي کڻي گجرات ويو جتان اجمير ۾ اورنگزيب کان شڪست کائي سبي طرف ويو جتان جيوڻ خان ھٿان گرفتار ٿي جڏھن بکر جي قلعي ڀرسان گذريو تہ اتي سندس ماڻھن جو قبضو ھو ان سان گڏ خزانو سندس پٽ ۽ ڪجهہ اھل خانہ رھيل ھئا جيڪي سخت لڙائي ۽ گهيري بعد بہ قلعي تي قبضو قائم ڪيون ويٺا ھئا آخر اورنگزيب جي فوج قيدي دارا کي چيو تہ اوھان پنهنجي سپه سالار پريم وير (کدڙو) کي چٽي لکو تہ قبضو ختم ڪري جنهن دارا جي چٺي پڙھي اکر سچاڻي بکر جو قلعو اورنگزيب جي سپاھين حوالي ڪيو
اھڙي طرح دارا ٻئي دفعا بکر جي قلعي ڀرسان گذريو پر ان ۾ رھي آسائش حاصل ڪري ڪون سگهيو.
حوالو۔ سٽوريا ڊوموگر
مصنف منوچي
امداد حسين شاه
ڪوٽ مير يعقوب علي شاه روھڙي.
Comments
Post a Comment